Ku Victor Angula
OMULUMENTU a li a tetagula omukulukadhi gwe nekatana oomvula ndatu dha piti po ngashingeyi okwa monika ondjo mOmpangu yoPombanda mOshakati. Daniel Ndara Kampanza gwoomvula 37 okwa li ta pangulilwa eso lyomukiintu gwedhina Berta Offen ngoka a li a si eso enyanyalithi sho a hahalwa nekatana momasiku 21 Maalitsa 2015 sha ningilwa momukunda gwedhina Kanovlei mOshikandjohogololo shaTsumkwe. Kampanza okwa li a lombwele ompangu ta ti okwa dhipaga omukulukadhi gwe nekatana ihe okwa li eshi ota dhipaga eyoka. Kampanza okwa hokolola ta ti okwa li a mona eyoka ongulohi ndjoka yoshiningwanima ihe konima sho a tetagula eyoka e tali si okwa ka mona kutya nani oshinima a dhipaga osho omuntu. Okwa ti ka li e na elalakano lyokudhipaga nakusa ngoka a li e na ehalo emu hokane po nokuli. Ihe Omupanguli Merline Tommasi okwa gandja etokolo tali ti Kampanza oku na ondjo medhipago nokwa dhipaga e na elalakano lyokudhipaga nakusa. “Omutamanekithi gwepangelo okwe shi ulike pwaa na omalimbililo kutya owa dhipaga u na elalakano lyokudhipaga omuntu. Uumbangi wa ulikwa mompangulilo ndjino otawu ulike pwaa na omalimbililo nkene wa longo oshimbuluma shika, wa hahala nakusa nekatana iikando oyindji sigo ta si. “Kapu na uuyelele tawu ulike kutya owa longa oshimbuluma shino omanga wa li kohi yondhungo nenge yiingangamithi nenge wa li monkalo waaha li wu shi shoka to ningi. Kapu na uuyelele tawu koleke kutya oshoshili owa li wa mono omamoniko nenge wa uvu omawi gaathithi. Ompangu oya tseya kutya omapopyo goye kombinga yoku uva omawi noshowo oku mona eyoka, mbika iinima weyi dhiladhila wu yi popye konima sho wa mono kutya owa gwila muupyakadhi sho wa dhipaga omuntu.” Omupanguli okwa lombwele Kampanza opo a popye ngele okwa hala oku ithana ombangi nenge oombangi tadhi vulu okupopya muuwanawa we omanga inaa pewa egeelo kompangu. Kampanza okwi ithanitha omusamane Ronny Eino gwokomukunda gwawo a lombwele ompangu kutya Kampanza oye omuntu a tya ngiini naanaa moshigwana. Eino okwa lombwele ompangu ta ti Kampanza oye a kala ta tekula aakwanezimo yanakusa, nongashingeyi sho e li mondholongo aakwanezimo yanakusa oye li mehalakano. Ompangu oya ti otayi ka gandja egeelo kuKampanza muule womasiku gontumba. Kampanza okwa li i ikalela po ye mwene mompangu omanga epangelo lya li lya kalelwa po kuMartha Nghiyonanye, nomupanguli oye Merline Tommasi.
comments
Confidente. Lifting the Lid. Copyright © 2015
